Share Button

بقلم /أيمن بحر 
خلااااص … خلصنا كلاااام … وكل اللى عنده رأى قاله !!؟؟ … وكل اللى عنده فتوى فى الأمن القومى وتأمين الكمائن والإستراتيجيات العسكرية قالها !!؟؟ وكل الهبّيدة أشبعوا كل ميولهم الصحفية والعسكرية والأمنية وإلإستراتيجية !!؟؟ …..
طب نتكلم بعقل شوية بقى .. !!؟؟
إوعى تكون فاكر إن اللى حصل فى سيناء فى أول يوم العيد ، ماكانش له علاقة بموضوع صفقة القرن اللى بيتكلموا عليها ، واللى مصر أجلت الإعلان عنها مرتين لحد دلوقتى ، من مارس ، لإبريل ، لأخر يونيو .. و ياعالم هــ تتأجل تانى وإلا لأ !!
إوعى تكون فاكر إن اللى حصل فى سيناء فى أول يوم العيد مالوش علاقة بوصول عشماوى واللى معاه لمصر ، والرجّة الكبيرة اللى حصلت لممولى الإرهاب وداعميهم ، ومحاولة إيجاد أى رد فعل علشان يرفعوا الروح المعنوية للنهايات الطرفية اللى بينفذوا تعليمات المعلم الكبير قبل ما تنهار روحهم المعنوية أكثر وأكثر
إوعى تكون فاكر إن اللى حصل فى سيناء فى أول يوم العيد مالوش علاقة بتصريحات الرئيس السيسى عن إن الوضع الأمنى فى شمال سيناء اصبح أمن بنسبة كبيرة بسبب العمليات العسكرية والتواجد الأمنى …. أو بكلمة الرئيس السيسى الأخيرة فى القمة العربية عن حل الدولتين على أساس حدود 4 يونيو 1967 والقدس الشرقية عاصمة لفلسطين .. وسيناء برة أى كلام أو مزايدات …
إوعى تكون فاكر إن اللى حصل فى سيناء فى أول يوم العيد مالوش علاقة باللى قاله الرئيس السيسى مؤخراً “هو إحنا كنا بنحفر أنفاق وبنستزرع أراضى وبنعمر سينا علشان نسيبها برضوا !!؟؟”
إوعى تكون فاكر إن اللى حصل فى سيناء فى أول يوم العيد مالوش علاقة باللى بيحصل فى السودان ، والتواجد المصرى بشكل رئيسى فى كل خطوة بتحصل ، لدرجة إن روسيا والصين أعاقوا مشروع قرار فى الأمم المتحدة يدين المجلس العسكرى السودانى بجرائم حرب .. وقالوا ده مش ممكن يحصل وإننا لازم الأول ناخد موافقة الإتحاد الأفريقى اللى بــ ترأسه مصر !!
يعني لازم ناخد رأي مصر الاول
واقرء مقالي بعنوان القوميون قادمون هل ده صدفه
إوعى تكون فاكر إن الحملة الممنهجة اللى فى السوشيال ميديا ، و اللى بــ تتم على وزير التربية والتعليم ، و دار الإفتاء ، والأزهر ، والجيش ، والقضاء ، و على بعض الرموز فى مصر .. والتقرير المطول اللى نشره دكان الضانى المسمى بــ حقوق البتنجان .. قصدى الإنسان ، عن الأوضاع فى سيناء .. كل ده كان صدفة .. واخيراً دخول جروبات الماميز والبابيز والتانتيز على الخط والكل قاعد بيفتى بمنتهى التبجح فى كيفية تأمين الوضع فى سيناء … إوعى تفتكر إن كل ده شئ عادى !!!
إوعى تكون فاكر إننا فى سيناء بنحارب شوية بهاليل لابسين جلاليب وماسكين سبح وبيقولوا قال الله وقال الرسول .. لأ طبعا .. إنت بتحارب تنظيمات دولية وأجهزة مخابرات عالمية وتمويل مادى وعسكرى لا متناهى … وكل ده هيفضل مستمر و مش هينتهى بسهولة بعد اللى قامت به مصر فى 30 يونيو بإسقاط مخطط خاص بالمنطقة كلها ، إتصرف عليه تريليونات للتحضير له على مدار 40 سنة … يعنى اصحاب الليلة دى كلها مش ممكن هــ يسيبوك كدة ويقولولك .. خلاص يا عم .. حصل خير .. وعفى الله عما سلف .. وصافى يا لبن .. حليب يا قشطة .. لأ طبعاً .. و لو انت خلاص بقى زهقت وقلبك وجعك وتعبت من اللى بيحصل ده .. أومّال المسئولين عننا كلنا وعن البلد وشايلين مسئولية شعب بحاله ، وشايفين الصورة على حقيقتها يقولوا إييه !!
المشكلة إن فيه ناس كتيرة مش قادرين يفهموا إنه مافيش فصل أبدا بين ملف المخططات فى المنطقة وبين ملف الإرهاب .. مش قادرين يشوفوا الصورة اللى أصبحت واضحة جدا بعد اللى حصل مع داعش الل تم إعلانهم تنظيم إرهابى ، والحرب المزيفة المعلنة عليهم من العالم كله ، و وقت الجد وبعد ما تم تحقيق الهدف من وجود الدواعش بتدمير وتقسيم دول المنطقة .. وبعد ما الكل قعد على مائدة المفاوضات وقسموا المتقسم …، نزلوا ولموا الكروت بتاعتهم وأخدوا رجالتهم وشحنوهم فى أوتوبيسات مكيفة وطيارات علشان يستخدموهم فى مناطق تانية من العالم !!
الأهم بقى من كل ده … إن اللى حصل فى سيناء كان فعلا كمين .. لكن مش للضباط والمجندين اللى إستشهدوا .. لأ … الناس دى متعودين على وجه الحرب القاسى .. وعارفين هم بيواجهوا إييه فى سيناء .. وبيتسابقوا علشان يروحوا هناك ، و ينولوا شرف وجودهم فى أطهر بقاع الأرض بعد الأرض الحرام .. ويا إما النصر ، أو الشهادة …. لكن الكمين اللى حصل كان لينا إحنا .. أيوة لينا إحنا …
إحنا اللى كل مرة بنسقط فى الفخ .. كل مرة بنقع فى الحفرة اللى بتتحفر لنا .. كل مرة بــ نتهز ، ونتشوشر ، ونسمع لده ، و لده ، ونشيّر من ده و من ده .. و بــ نتداول أخبار مزيفة ، وتسريبات مفبركة .. و بدل مانكون إحنا الظهير الشعبى اللى بيقف فى ظهر حماة الوطن .. بــ يبقى بعضنا هو السكينة اللى بتتغرز فى ظهرهم
لازم تبقى عارف إن أى جيش فى العالم وهو بيحارب ، بيستمد قوته من تقته بنفسه وتسليحه وروحه المعنوية العالية … الروح المعنوية دى اللى هى ظهره … يعنى أنا وإنت وكلنا .. ويوم ما الروح المعنوية دى تنهار ، يوم ما ظهر الجيش ده هــ يتقطم.
سيناء التى ارتوت بدماء كثيره من ابنائنا منذ عام 1973 وحتى الان .. ومازل البعض يرى ان موضوع الحرب فى سيناء طول اوى و شايف ان شويه عيال مش عارفين نخلص عليهم … بالعقل كده تعالى اقولك حاجه :
سيناء تبلغ مساحتها 60088 كم ( ستين الف و ثمانيه و ثمانون كيلو متر ) وتعتبر حوالى 6% من مساحة مصر الاجماليه ولو بصيت على طبيعتها الجغرافيه فهتلاقيها صحراويه جبليه يعنى متقسمه حوالى ثلاثة اقاليم مابين صحراويه و جبليه ( اقليم السهول – اقليم الهضاب – اقليم المرتفعات ) متقسمه بالترتيب من شمال سيناء الى جنوبها .
كل العمليات العسكريه متركزه فى شمال سيناء يعنى فى الاقليم الصحراوى و جزء من اقليم الهضاب والمرتفعات عارف ده معناه ايه ؟؟؟
انت بتحارب اشباح فى مساحه صحراء شاسعه زى ماقلت ومعرض ان تجدهم فوق الارض او تحت الارض … معرض تدوس على لغم وانت ماشى يكون مستهدف مدرعه او كمين … معرض تاخد طلقة قناصه فى نص راسك وانت فى مكانك … معرض لسيارات تدخل عليك وانت مش عارف ده عدو ولا حبيب و فجاءه تلاقيها انفجرت وده كله غير تعرضك لبعض الكائنات الخطره كالعقارب و الثعابين و الضباع و الذئاب الجبليه .
تفتكروا المساحه دى وخاصه فى وجود حدود ليك مع حكومه بتكرهك زى حماس و دوله عدوه زى اسرائيل هيكون التعامل والمعيشه فيها سهله و كام عيل ونخلص عليهم و خلصنا ؟؟؟؟ انت كل يوم بتكتشف انفاق وكل يوم بتكتشف بيوت مهجوره مستخدمه فى التخفى والاعداد للعمليات الارهابيه ولو نفتكر هنلاقى فى كل بيان من القوات المسلحه جمله بتتقال عن الانفاق بيقول عنها مجهزه هندسيا !! يعنى الناس دى مش بتحفر نفق و خلاص لكن بتحفر و تامن سقفه و تبطنه كويس بحيث يتحمل اى ضغط فوقه و يسمح بهروب اعداد كبيره ويكون مأوى لفتره و جواه مواد اعاشه .
ماتعانى منه مصر حاليا من عمليات ارهابيه هو جزاء لرفضها صفقة القرن قديما منذ 2010 وحديثا باقتراح ترامب … اصل الفكره دى من زمان من 2010 وكانت اصلا اقتراح مستشار الامن القومى الاسرائيلى جيورا ايلاند …
وتمت المحاوله لغايه ما كانت هتنجح ايام المتخلف مرسى و وقتها اصدر الرئيس عبد الفتاح السيسى قرارا وقتها كوزير دفاع بحظر تملك الاراضى المتاخمه للحدود لغير المصريين و فشلت خطتهم … تفتكر يسكتوا ؟؟؟
رجعوا تانى فى 2018 مع ترامب وظل الموضوع سرى حتى ظهر فى 2019 و رفضته مصر برده و كعادة المفلسين اليهود و الامريكان اللى ميجيش بالذوق والفلوس ييجى بالعنف و الارهاب … ده اللى عايشينه حاليا .
خلينا نصبر لان الموضوع كبير فوق ما نتخيل كلنا و قسما بربى احنا مش بنحارب عيال صيع فكرهم متشدد ولكن بنحارب دول ومخابرات … بلاش نسلخ الدوله و القيادات مع كل موقف يحصل او عمليه ارهابيه تتم … وبرده هقولكم اثبتوا فالقادم اصعب
أرجوك .. بلاش تقع فى الفخ كل مرة … ما تخلّيش حد يضحك عليك ويستغلك لهزيمتك .. أو إنه يخليك مدخل يقدر يدخلك منه لضرب جيشك وبلدك…!!!!
نترحم على شهدائنا ونساند جيشنا وقادتنا ونخلى عيونا على بلدنا..
حفظ الله مصر حفظ الله الجيش

Share Button

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *