Share Button

بقلم الشاعر / عادل أيوب
____________________

الوو .. الووو
إزيك يلّي من قلبه قريبه
فلان حكالي أقلك كلمتين ..
بقالك يومين مبتردوش على رسالته ..
زعلان جداً و وجعاه كرامته
فقرر يكتبلك آخر قصيده
يقول فيها …….

********************
و لمّا منِّك يتقرّب و يتودَّد
مَتقوليش ماله
بيدَّحلب و يتَّعلب ..
متظلمهوش يا بنت الناس
و تزيدي وجع على وجعه

*****************
و مِنّه … و مِنّه متخفيش دا مبيأذيش
هو إللي بيحب يقدر يكره و لا يضر ؟؟
لا طبعاً …
ده مستعد يهديكي قلبه بين يديكي
بس كل الحكايه أنُّه مُعجب لكنّه بيخجل
و مش عارف يوضح
و لا عن مشاعره يعبّر
طيب قوليلي إيه يعمل

*********************
نفسه يجيلك ….
نفسه يجيلك و يقلك أنه بيحبك
و نفسه ياخدك بين ضلوعه و يضمك
يشكيلك و يحكيلك و يفضفضلك
و آخر الليل يا ستّي يترمي فحضنك
يبص فعيونك …
يلعب في صوابعك
يفك ضفايرك و يشم ريحة شعرك
و ييجي تاني يوم برضو يعترفلك أنه تاني بيحبك

********************
بس خايف …
خايف من ردة فعلك و الغضب
و خايف لما منك يقرب فيتألّم …
ماهو أنت بعيونه سندريلا و يمكن أصعب
أو ملكه ساكنه جوّا معبد
عليها ألف رصد و يمكن أكتر

*************************

و هو … هو واد غلبان
ضعفان و فقران
ما يعرف حاجه عن النسوان
ضيع أجمل سنين عمره في الغربه
شاف الذُّل و الليالي المُرّه
و أنتي ليكي ألف معجب و مغرم ..
و ألف عاشق و متيّم
فيهم الدكتور و فيهم المهندس و فهم ال___ ………
أحلى منه و أغنى منه
حتى في الكلام ألبق و أسرع
و هو جمله كامله من لسانه مش عايزه تطلع
طيب ينفع ؟!!!
هو قلك من يومين مفيش لُقى بين عصفور و سمكه
بس أنتي مفهمتيش قصده
محسِّتيش بوجعه
و بعدين هتحسى بمين و لا بمين دأنتي يا حبيبته معذوره

*****************************

بس صدقيني …
بس صدقيني عمر ما حد حبّك قدّه …
أنا عارفه مستعد يفديكي بعمره
و متقوليش دا واد كداب و بتاع حوارات
آخره يكتب قصيده و يتباهى بيها قدام البنات
بتاع كلام و قصص غرام
عايز يقضي يومين معايه و بعدين يقولي سلام …

********************
يا بنت الناس متظلميهوش و بالراحه
بالله عليكي ما تزيدي جراحه
و لو مش عايزه حُبّه خلاص
أنا هقوله ينسى كل حاجه كل الكلام
و الأماني و الأحلام ..
و معاكي من النهارده يخف الكلام ..

***************************
بس آخر طلب قبل ما أكتب سلام
متهجريهوش و متظلميهوش
و منه …… متخفيش دا مبيأذيش
بس وصّاني بكلمتين
آخر القصيده يمكن تفهميهم
و أكيد قلبك هيحس بيهم
الأولى أنه بيحبك
و التانيه الله يحميكي يا نور عينه …

Share Button

By ahram

جريدة اهرام مصر .موقع ويب اخبارى واعلامى

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *