Share Button

بتفرقي بينا ليه
ــــــــــــــــــــــــــــ
مش انا وهوه ولادك
بنشم نفس الهوا
واتولدنا سوا
ورضعنا من حليب النيل
ومن نفس ارضك أكلنا
يبقي ليه بتفرقي بينا
ليه هما ساكنين فوقنا
في الوظايف والمناصب
في المصايف والمكاتب
ليه هواه اكسجين
وانا هوايا كربون
ليه هوه في قصورك أمير
وانا في حواريكي غفير
مكتوب عليا احرسه
وقوتي بالذل أغمسه
ليه تفرقي بينه وبيني
ليه يامه تكوني
من الظالمين
وانا اللي شايلك جوه العين
وعمري ليكي ماهين
انا اللي شايل سلاحك
وهوه اللي حاصد وسامك
هوه احنا يامصر من أبين
ابويا مين
وابوه مين
انا ابويا من الشقيانين
وهو ابوه من السلاطين
وإيه اللي خلاكي
تتجوزي اتنين
واحد من مارينا
والتاني م الفلاحين
كنتي اكتفيتي بواحد
ياست العاشقين
وخلفتينا متساويين
شقايق
مش أسياد وعبيد
واحد في قصر
والتاني في عشة جريد
واحد في حزن
وواحد في عيد
ــــــــــــــــــــــــــــــ
شعر /السيد حماد

By ahram masr

جريدة اهرام مصر .موقع ويب اخبارى واعلامى

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *