Share Button
بعد صباح الخير ع الساده
ياللي جمالكم فوق العاده
وقبل ماتخدوني ف سهوه
أنا ب أشرب القهوه زياده
ودماغي ب أول فنجان
يكتب شعر تقول مزيكا
لاااا تقولي بيكا وسلطان
أنا شعري تغنيه مياده
بكتب أنا علي أي بحور
أنا شعري زي العصفور
يتعلق فوق الأغصان
ويحلق ويعدي السور
إتعلمت الشعر ب طولي
وغزيت بحره ب أسطولي
لو فيه بحر ما جربتوش
عم خليل أهو بسطهولي
أنا جربت الشعر ده ياما
ملقتشي في الشعر ملامه
غير ربي ونفسي اللوامه
علمني الشعر إني أتواضع
ماعرفشي أكدب وأخادع
الكلمه إن طابقت للواقع
يبقي لأشعارك تأثير
والكلمه توصل للنور
Share Button

By ahram

جريدة اهرام مصر .موقع ويب اخبارى واعلامى

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *