جاءنا البيان التالي

جاءنا البيان التالي
Share Button

جاءنا البيان التالي

ــــــــــــــــــــــــــــ

مندوبنا أفاد

خبر يهم العباد

في كل البلاد

مصر المركز الاول

إفرحو ياولاد

في التعليم؟

لأ يابهيم

في الصحه؟

لأ يافالحه

أمال في إيه حيرتنا

علشان خاطرنا

قول لنا

طلعنا القمر؟

لأ يابقر

هي حاجه برضو عن السفر

نعش طاير علي القضبان

ماتعرفش ليه دايما زعلان

وعلي ركابه دايماغضبان

يعمل إيه

يعمل قلبان

ويوديهم في خبر كان

وكل القطارات متفقين

ع المصريين

يدفنوهم ولو صاحيين

من الصعيد للشرقيه

واسكندريه الماريه

ومن طوخ للمنوفيه

حتي مطروح

مني فين هاتروح

انا قدرك ومصيرك

ياويلك مني ياويلك

انا قدرك ومكتوبك

وللموت انا رسولك

ومالكش عني ديه

قضاء وقدر

ودي سكة سفر

كلنا متعرضين

للنهايه المصيريه

تموت تحت قضباني

او جوه العربيه

عمرك معايا انتهي

ودي حاجه عاديه

ولادك يبقو أيتام

ومراتك تبقي وليه

وهنوعدهم بالديه

وبعدين تموت القضيه

وكل يوم هيا هيا

الحكايه المرويه

وشوية أخبار

ولقب شهيد

وشريط اسود

علي شمال الشاشه

ومسئول كله بشاشه

يطلع ويقول

المايل هايكون معدول

بس اصبرو علينا شويه

ماهو لازم لكل قضيه

يكون ضحيه

يلبس بدالنا السلطانيه

قصدي المسؤليه

غفير المزلقان

كان واقف سرحان

وبيندغ لبان

والبيه السنافور

كان مسطول

وضاربله جوان

اما السواق

كان بيعمل شاي

ماخدش باله

هوه رايح ولا جاي

ضربله قرصين برشام

وقعد يقسم ع الناي

معلش بنعتذر للي مات

واللي تصاب من سكات

ويومين وقبل ماننسي

في انتظار قطر جديد

ياخدنا لقبر بابه حديد

في نفس السكة

والمواعيد

وموت موت ياهلفوت

مالكشي ديه بعد الموت

بس المهم والأهم

اننا رقم واحد في الهم

علي مستوي كل الأمم

في الوجع وفي الألم

الفين مبروك يامصريين

مصر الاولي

مصر الاولي

فهمتو الفوله

ولا لسه يامصريين

ـــــــــــــــــــــــــــــــ

شعر/السيد حماد

ahram masr

جريدة اهرام مصر .موقع ويب اخبارى واعلامى

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: