Share Button
دكتور عبدالله أحمد بيقولك ” افهموا نفسية طفلكم بعد الطلاق ! “
نشوي شطا
“خلينا نفضل سوا عشان الأطفال”
تفكير كتير من الأهل اللي بيخافوا من فكرة الطلاق عشان تأثيرها على أطفالهم النفسي والإجتماعي..
يشير استشاري العلاقات الزوجية والأسرية د.عبدالله أحمد طبعًا مننكرش إن الطلاق تأثيره على الطفل كبير، بدل ما كنا أسرة بقينا أسرتين وده شئ غريب عليه تقبله، ولكن ده ميمنعش إن الطلاق وارد وتعامل الأهل مع اطفالهم في المرحلة دي خطوة مهمة جدًا، وحياة الطفل بين أهل منفصلين واعيين أفضل من حياته في أسرة واحدة ولكن بيئة غير صالحة للحياة..
ويضيف دكتور عبدالله أحمد في المقال ده هنتكلم عن إزاي كل مرحلة عمرية بتتأثر بالطلاق بصورة مختلفة..
وهنبتدي بالأطفال الصغيرين اللي بيعيشوا مشاعر الحيرة والخوف، الحيرة ليه كان عندنا بيت واحد بقى عندنا بيتين، وخوف من الفقد، لما بابا وماما بطلوا يحبوا بعض، هل ده معناه انهم ممكن يبطلوا يحبوني أنا كمان؟
ونتنقل بعد كدا الأطفال الأكبر شوية حوالي عشر سنين بيمروا بمشاعر قلق واحساس بالذنب، احساسهم تجاه الطلاق إن ممكن يكون بسبب فعل خطأ هو عمله، وممكن بابا اتخانق مع ماما عشان انا مجبتش درجات كويسة في المدرسة، أو عشان طلبت منهم اللعبة الكبيرة.. ويمروا بمرحلة من الشعور بالمسئولية والذنب لانه احساسهم بالمسئولية في الفترة دي بيبدأ يتكون..
ويضيف استشاري العلاقات الاسرية انه في سن أكبر شوية في مرحلة المراهقة بتظهر مشاعر غضب.. بيكون الطفل هنا في مرحلة لوم وعتاب لأحد الوالدين اللي شايف من وجهة نظره انه أخطأ، والمراهق عادة بيكون غاضب على حاجات كتير في العالم والتغيرات اللي بيمر بيها بالفترة دي مش سهلة، فالتغيرات بتزيد عليه، وبتزود احساسه بالغضب..
ويختتم د.عبدالله أحمد حديثه دي المشاعر اللي بيمر بيها طفلك حسب سنه، وهو مش مترجم المشاعر دي، وانتو مش فاهمين ردود الأفعال اللي بتظهر دي بتظهر ليه.. فخلينا نتفق إن الوعي باللي بيفكروا فيه خطوة مهمة جدًا عشان نقدر نفكر سوا إزاي نتعامل معاه، وعشان الطفل يتخلص من المشاعر السلبية ويقدر يفهم المرحلة دي بصورة صحيحة ويتعايش معاها.. وده اللي هنتكلم عنه في المقال اللي جاي..
Share Button

By ahram

جريدة اهرام مصر .موقع ويب اخبارى واعلامى

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *