رباعياتي 12

رباعياتي 12
Share Button

رباعياتي 12
ــــــــــــــــــــــــــــــ
اتربيت واتعلمــــت علي قـــول الحق
وأعلي صـوتي واقول للظلــــم ألف لأ
الرزق منــــه والعمـــر بإيد رب الخلق
ملعونه الكلمة اللي تموت جوه الحلق

لانا طبــله ولا طبـال لسلاطينك
أنا طـــوبه بالزعفـران من طينك
تعلي جدار في أسوارمحـوطاكي
انا في العشق من أكبر مجانينك

انا عاشقك وعاشق زعفران طينك
انا فـــــداكي وفدا لكل محبيـــنك
انا إبنـك اللي راضع حليـــب نيلك
في الحرب دانه وفالسلم مواويلك

انا العطشان وانا ساكن علي نيلك
انا المجــــروح وبألامي بغنيــــلك
اناالمطحون والمحروم من خيرك
علشان تعـــلي أبراج سلاطيــــنك

انا المسروقه أحلامي في أرضك
انا الساكن في عشه علي طـرفك
انا المنسي والمحذوف من عقلك
ليه يامه مانابرضو من ولاد بطنك

بصفتي إني بحبك أكتر من روحي
ومخبي حبك جوة قلبي وفروحي
وأفـديكي بإبني وابـــويا وبروحي
مابنمش الليل من ألمي وجروحي

انا اللي مفصل من جلدي راياتك
وكاتب بدمي إسمـــك علي بابك
انا المنصـــور في كل غـــزاواتك
اناالمجهول والمدفون في حاراتك

إحنا الغلابه اللي بتصنــع مجدك
إحنا العــرق اللي بنســقي زرعك
إحنا الشهدااللي صاينين عرضك
والممنوعين نلمس حتي سرجك

انا اللي بطهر بدمعي أوجاعي
انا اللي الجـوع زادي ومتاعي
انا اللي خايف مالقاش ليا قبر
واناشايفك أدام عيني بتتباعي
ــــــــــــــــــــــ
شعر السيد حماد

ahram masr

جريدة اهرام مصر .موقع ويب اخبارى واعلامى

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: