صباحك انا صباحك هنا

صباحك انا صباحك هنا
Share Button

صباحك انا صباحك هنا
احلي صباح علي حبنا
لما شمس الدنيا تطلع
وتاخدنا جوةحضنها
وبدفاها تضمنا
انتي وانا
يبقي اكيد صباحنا
هنا علي حبنا
انتي وانا
ـــــــــــــــــــــــــــــــــ
لما شفت الشمس طالعة
شوفت صورتك
وصوت العصافير عالشجر
زي ضحكك
وكان قبل منها القمر
واخد ملامحك
غير هدوء الليل اللي
فكرني بصمتك
افتكرتك لما قطعتي
علينا السكون بصوتك
وغنيتي اغانيكي
والبلابل بتقول معاكي
والكروان بيدعي ليكي
الله الله عليكي
ـــــــــــــــــــــــــــــــــ
حسيت كأني عايش
في روضة من الجنة
وحور العين تناديني
تعالي واتمني
قلت مش عايز غيرك
افرح بيها واتهني
اعيش ساعات الصفا
بين ايديكي وعلي ايديكي
انقش انا الحنة
وبصوتي اغنيلك
من كل جميل معني
وانتي معايا بصوتك
تخلي للنغم معني
والحور حواليكي
تسمع وتدعيلك
الله الله عليكي
ــــــــــــــــــــــــــــــــــ
افتكرت لما مرة بصيت في عينك
شفت الشمس جنب القمر
في واحدة منهم
وشفت في التانية بساتينك
شفت الورود فوق خدودك
والفراولة فوق شفايفك
وزهر الفل ملضوم عقد
حوالين جيدك
شفت الريحان علي شمالك
والياسمين علي يمينك
مزينين طريقك
وانتي زي الغزالة
ماشية تتمايلي مابينهم
وحواليكي طيور السما
بتردد اغانيكي
وتقول الله عليكي
ــــــــــــــــــــــــــــــــــــــ
بحبك ياللي ماليتي
ايامي فرح وهنا
رجعتي ليا ضحكتي
وأنغامي والغنا
زرعتي جوايا امل
طرح في قلبي المني
رجع لعيني السنا
خلاني احس اني انا
سلطان علي عرش قلبك
واني صاحب بساتينك
واني الوحيد في فرحك
اللي هالمس فساتينك
واني وحدي اللي هاقطف
ورودك واشم رياحينك
واني بس اللي هاشرب
شهدك واسبح جوة نيلك
وارتاح جوة حضنك
واسمع مواويلك
ــــــــــــــــــــــــــــــــــ
شعر/السيد حماد

ahram

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: