كنت بفكر اشتري كيلو فاكهه لولادي
وم العجايب إن سي بصل عدى المرادي
عدى الموز والفراولة
حتى المانجه كده علاولة
فضلت اتحسبن فمين يا دولة
مع إن طول عمري قانع وراضي
عنيا راحت ع العنب
لقيت ف ضهري أتب
ومفاصل ركبي ب تدب
وبياع ف وداني بأعلى صوت بينادي
دوب ف الحنين يابو ثورتين
ادي يناير وادي ثورة تلاتين
أنا كنت فاكر إن آخر ثورة إسمها اتنين وخمسين
زي كل الناس عصرت ليمونتين وعادي
اللي قالوا عيش حريه
واللي قالوا بلدنا قويه
وانا م الهم بدعك ف عنيا
بحلم أنه اشوف ف العلا بلادي
وسي بصل قرب م العسل
رضعونا خوف وكسل
وكله يوعد ويتنصل
والمعدوم ف وادي والكرسي ف وادي
روحت محمل ببكا
لا يطول زمن اللقا
يدوب تسويف وعنعنه
ودخلت بشويه دموع والكيس فاضي