مصرية وأفتخر
بقلم:حنان مصطفي
ممكن حد يكتبلي أسماء العلماء العرب على مر التاريخ اللي برزت أسماءهم في العلوم المادية (الطب – الهندسة – الكيمياء- الفلسفة – الطبيعة -….الخ) ؟
العرب طبعا المقصود بيهم المولودين في شبه الجزيرة العربية … لأن تاريخيا المصري والشامي والعراقي والفارسي والمغاربة غير عرب ..
ابن النفيس وابن الهيثم وابن سينا وجابر بن حيان والرازي والخوارزمي كلهم غير عرب …
تصدق إن حتى العلوم الشرعية اللي دونها أعاجم وليسوا عرب خُلَّص !!
البخاري ومسلم والغزالي فارسيين والترمذي أوزبكستاني والنسائي تركمانستاني وأبو داود وأبو حنيفة عراقيين …
يا راجل ده حتى علماء اللغة العربية نفسها تلاقي سيبويه فارسي والأخفش عراقي …
دول عاشوا أعاجم وماتوا أعاجم ومحدش فيهم قال على نفسه ولا غيره قال عنه إنه عربي ، وعلى فكرة (العجم) مش شتيمة ولا نقص بل معناها في المعجم الوسيط : هو خلاف العربي سواء نطق بالعربية أم لم ينطق !!
البعض جعل العربي له شرطان : الأصل العربي ، واللسان الفصيح … يعني لو لسانه غير فصيح ميبقاش عربي مخلص ، ولو لسانه فصيح ومش مولود في شبه الجزيرة برضه مش عربي …
البعض ممكن يصدمه الكلام بس دي الحقيقة ، احنا مصريين أصولنا مصرية وده الأصل ، البعض منا أصوله غير مصرية ممكن أصول عربية تركية أمازيغية …الخ
لو الإسلام ظل بين العرب فقط وأوكله الله إليهم لماتت الرسالة في مهدها !! يا راجل ده حتى الآثار الإسلامية والطراز الإسلامي في العمارة والزخارف كله من ابتكار الأعاجم !!
صحابة سيدنا النبي صلى الله عليه وآله وسلم منهم صهيب وسلمان وبلال اللي عاشوا في شبه الجزيرة العربية ولسانهم اكان أفصح من كثير من العرب … لكنهم لم يفقدوا هويتهم ولم يتبرأوا منها فكان صهيب (الرومي) وسلمان (الفارسي) وبلال (الحبشي) محدش منهم هرب من أصله وتنكر له بحجة أن أجدادهم كانوا يااااي كفار ومش مؤمنين …
ده عمرو بن هشام (أبو جهل) لما أسلم ولده عمرو ، النبي نهى أصحابه أن يذكروا أباه أمامه بسوء حتى لا يحزن ، (سيأتيكم عكرمة بن عمرو مؤمنا مهاجرا فلا تسبوا أباه فإن سب الميت يؤذى الحى ولا يبلغ الميت ) حديث صحيح …
لاحظ إنه قالهم عكرمة ابن عمرو ما قالش ابن أبي جهل ، رغم أذاه المباشر للنبي والمسلمين ولسه الدم ما بردش … بس خلاص الرجل مات وابنه هيتأذى !! طب انت وهو يا ولاد المتضايقة نازلين شتيمة في أجدادكم اللي ماتوا وانتهوا من آلاف السنين ومشغلين أسطوانة الولاء والبراء ، وانتو لا عارفين تاريخهم ولا أسماءهم أصلاً ولا أي شيء عنهم !!!
قال ايه : ربنا أنجاهم ببدنهم لنرى فيهم العبرة والعظة …
أيوة مظبوط ؛ زي ما ربنا خلقكم قدامنا لحم ودم عشان ننظر إليكم ونسمع كلامكم ثم نقول : الحمد لله الذي عافانا….