مليت ياحزن اوطانى…
شعر د.ضحى بركات
مليت ياحزن أوطانى .. .
أنا المصرى على أرضى وللا احنا فى بلد تانى
فين الضحكة والفرحة ..وليه الآه ملازمانى
ليه مهموم على عيالى… وخايف ينسوا لحنانى
وليه مش قادر اتكلم ..واقول فيه حاجة تعبانى
وليه وحدانى بين أهلى وليه بيدوسوا إنسانى
وليه ساكت على حالى… وراضى ذل حرمانى .
*******
ياناس اتغيرت الاحوال …ولسة الخلق حاسدانى .
لى كم جار نسى العشرة وكان له قيمة فى كيانى
وكم أحباب بقوا الأغراب.. بدون أسباب ولا.. جانى
*******
نسينا الفضل والإيمان…وسكة للرضا وغفران ..وروح حلوة مسامحانى
وعاش خوفنا ورا الجدران .مابين مجنى عليه ..وجانى
وياما ناس بتتألم ….وياما خلق بتعانى
وداق مر الأذى وناره … مينا وحنا اللى نصرانى.
وناس من جيش ومن شرطة وليبرالى وعلمانى
كفاية غدر أو إرهاب ..كفاية ظلم ,مر ,عذاب ..حضن الأمن جافانى
*******
مليت ياحزن اوطانى ..
ليه يادمع فيك حرقة… وصرخة تهز وجدانى
وعليت بعد ميت فرحة بسوط الظلم أحزانى.
ونفسى اشتكى همى وخايف يقطعوا لسانى
ده لو صوتى على مرة تشق الطلقة فى جنانى
وميت صرمة وفى الضلمة أموت والناس دى تنسانى
**********
مليت ياحزن أوطانى
وكنا فى الهنا بنجرى ونجمع فى الصباح وردى وحلمى يعيشه ميت بانى
وكان جدى على دربى يجمع كل خلانى
ولو أشكى يزيح همى غريب وقريب وعربانى
وحشنا روح زمن حانى ..وفيه اللمة نقصانى
سكت وآهى وجعانى و حرى يكوى وجدانى
لامونى الناس على صبرى على حزنى وأشجانى
وانا مغلوب على أمرى ورب الكون بيرعانى
******
يارب أنت بنا الدارى وشعبى قلبه ربانى
يارب افرجها فى لحظة ده كل الخلق بيعانى
وزيح الهم بالقدرة اللى عارفها وعارفانى
وغير فى القلوب قسوة ..وبدل حزنها نشوة. ونور للعفو إنسانى
واطرح أرضنا خضرة وبركة وخير وريحانى
يارب رحيم وفضله عظيم تجيب دعواتى وأمانى
ونادى القاصى والدانى وجمع شملنا تانى
وفرح كل خلانى وضمة مصر حضنانى
ننسى الفرقة والغدرة ونرفع راية البشرى
وبسمة ونصرة أو ذكرى فاكرها تبر أوطانى
وتصبح مصرنا بكرة على تاج العرب درة
ونرجع كلنا أسرة ونحرق دم عدوانى.