Share Button

كتبت نهي عبد الخالق

القصة السادسة و العشرون #بطلة_قصة_ابنائها مدام / منال احمد محمد الاعصر (محافظة القاهرة) بتحكى قصتها 👇 الصراحة انا مشوارى طويل شوية ابتدى لما ابو اولادى سافر برا مصر وابنى الكبير كان عمره خمس سنوات والبنت الوسطى سنتين ونص والتؤام عمر وفرح تلات شهور وعمر ابنى متلازمة داون من ذوى الهمم *

مرة واحدة لقيت نفسى فى البحر ولازم اكمل لوحدى ومن طبعى مش بدخل حد فى حياتى صبرت واستحملت حاجات كتييير اوى اوى وكانت امى مريضة جدا وكنت بتابعها مع والدى واتابع اولادى واتابع حمايا وظروف كانت صعبة اوى ووالدهم بيقول ظروفه صعبة عكس اللى بشوفة. و ابتديت مشوارى مع عمر ابنى اللى هو من ذوى الهمم بدرى فى مرضة لان كان بتيعرض لأزمات صدرية كتير وبيتحجز فى المستشفى وابتديت اعتمد على نفسى فى المصاريف بالتدريج ولما عمر كان عندة ١١شهر كان

لازم تدخل مبكر علشان كان أول مرة اتعامل مع طفل داون سيندروم روحت بية مركز سيتى وابتدى المشوار انا اتدربت عندهم واتدرب عمر معاهم ولقيت منهم دعم نفسى كبير ليا ولأولادى وابتديت ادخل المجال وعلشان خاطر عمر ابنى درست ف المجال ده اللى هو مجال الاحتياجات الخاصة واشتغلت أخصائية تنمية مهارات وعملت كل جهدي لزيادة الدخل.. وللاسف انفصلت عن ابو اولادى فى ٢٠١١

واعتمدت على نفسي كليا واولادى طبعا شركائى فى كل خطوة كنت بعملها مع عمر ومعاهم ابتديت اوجه عمر للسباحة وابتدى تبان موهبتة فى السباحة ودة ساعد على تقوية الجهاز التنفسي والأزمات التنفسية قلت كتير بسبب رياضة السباحة ثم معهد البالية واشترك فى ٢٠١٥ فى كورال افتتاح قناة السويس ثم حفلة اليوم العالمى للاعاقة ٢٠١٥ ثم تواصلت اشتراكات وكان اخواتة بيساعدونى بشكل قوى جدا جدا فى تمارينة واى مكان عمر هيروح هما معايا وبدالى وايدهم بايدى

ابنى الكبير اتحمل معايا المسؤلية من بدرى اوى اوى وبعده اختة وبعده توأم عمر واحداث كتيرة اوى اوى اوى ووالدى كان داعم نفسى ومعنويا قوى ورغم كدة عمره ما اتدخل فى حياتى او اتحكم فينا انا واولادى كان اب عظيم اوى.. وابتديت رحلة علاج التوام عمر و أخته .

ثم تفأجنا بمرض البنت الكبرى أن عندها أجسام مضادة بيهاجم الغدة الدرقية ثم الابن الأكبر نفس الأجسام المضادة اللى بتهاجم الغدد. والحمد لله على عطاء ربنا اولادى الأربعة عندهم مشاكل مناعية مختلفة والحمد لله ربنا يشفيهم جميعا ونكمل باذن الله و بسنده ليا هنكمل .

وابنى الكبير دلوقتى اتخرج ومعاه بكالوريوس سياحة وفنادق والبنت الوسطى كلية الهندسة وتوأم عمر فى ثانوى عام وعمر فى تلمذة فى التربية الفكرية وهو اجتماعى قوى وبيحب التمثيل وبيشارك معاهم فى مسرحية للمدرسة واستعراض وعمل حفلة فى حضور مديرة الإدارة التعليمية

والحمد لله رجع تانى يكمل كل حاجة بيحبها معادا الرياضة صحيا مش قادر وعمر شارك فى حفلة اليوم العالمى للاعاقة قادرين باختلاف الموسم الأول واتمنى من ربنا أن يشفى اولادى يارب وانى اقدر اكمل مشوارى معاهم و اتمنى عمر يكمل ف رياضة السباحة اللى بيحبها و اشوفه بطل عالمى و يحققوا كل امنياتهم. ادعولهم بالشفاء… انتهت القصة ……. ولأن حضرتك #

ست_ب١٠٠ست تم اختيار قصتك وحابين أننا نتشرف بتكريمك من ضمن ٣٠ أم معيلة بطلات فى حياة أبناؤهم فى احتفالية يوم المرأة المعيلة الحدث الاول في الوطن العربي #يوم_المرأة_المعيلة #الحدث_الاول_فى_الوطن_العربى الراعى الاعلامى بنشر قصص الأمهات موقع هير نيوز Hernews الراعى الاعلامى للحدث

Golden XYZ MEDIA

Share Button

By ahram

جريدة اهرام مصر .موقع ويب اخبارى واعلامى

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *