Share Button
بقلم داليا فوزى .
سيكولوجية القطة :-
ناس كتير بتحب القطط وبتحب وجودها ف البيت زى أى لعبه وقت الفراغ يداعبها أو يلعب معاها . معظم الناس مش فاهمين القطط وحركاتها ولا نظراتها ومش عارفين القطة بتحبهم فعلا والا هى جوازه والسلام .
اقصد طبعا القطة 🐱 أوعا تفهمني صح !
انا هأساعدك علشان تفهم القطة بتاعتك . القطة دائما تحب تهتم بيها وتساعدها فى تلبية رغابتها لكى تظهر أمامك دائما قطة جميلة ورقيقة زى أول ما دخلت بيتك . وكمان أول م تدخل البيت تجرى القطة عليك تتسمح فيك وتصدر صوت نونوه حنونه وفى منتهى الرقة .
عامل القطة بحنية دائما وأنت داخل البيت أحمل لها كل شوق وحب وزهرة جميلة تقدمها للقطة طبعا ! 🐱
لو سمعت صوت نونوتها بطريقة غير مفهومه أعرف إنها عاوزة حاجة وأوعا تفتكر أنها بتغنى علشان تسلى نفسها وتكبر دماغك ومتسألهاش فيه إيه . عندما تلاحظ أبدأ فى أن تلاغى القطة يمكن تكون عاوزة تخرج أو تتفسح وبلاش تطنشها علشان ما تقلبش عليك والنونوه هتقلب عوى يشبه النواح . خلى بالك إن صفات القطط تشبه النمور بنسبة 95% من جيناتها يعنى لو حاولت تعاكس القطة هتخربشك وتفتكرها إنها بتلعب أوبتهزر معاك هزار بايخ لا طبعا لأن الموجود فى جيناتها أكبر بكثير من الخربشة .
وأوقات تبقي قاعد فى حالك ولا بيك والا عليك تلاقى القطة متنحالك وبتبرقلك بعنيها وتسأل نفسك ياترى القطة نويالى على إيه طبعا أنت لازم تقلق وتفكر ياترى القطة زعلانه ليه وتبدأ تفتكر حاجات ممكن تكون حصلت من شهر مثلا ومش فاكرها لازم تفتكر أو تتعلم النونوه علشان تعرف هى عاوزة إيه . تلاقى القطة دائما متبعاك فى كل تصرفاتك وممكن تقتحم خصوصياتك ده طبعا لأنها عاوزاك تهتم بيها وبس ولو لاحظت القطة إنك بتهتم بقطة غيرها تبدأ تخطط وتقول يا أنا يا القطة . ومن تصرفات القطة وقت الغيره تبدأ برمى وكسر أقل حاجة فى البيت إلى أن تصل لأهتمامك أو تنهى كل ما موجود بالبيت واحده واحده .
نصيحة أخيرة خلى بالك من قطتك . 🐱
Share Button

By ahram

جريدة اهرام مصر .موقع ويب اخبارى واعلامى

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *