إنتي الأول
ـــــــــــــــــــــــ
شعر ..السيد حماد
قبل ماعرف اسمي نطقت اسمك
قبل ماقــــول مم رضـعت حــبك
وأول ضمة ليا كان في حضـــنك
وأول عشـــق انتي وأول أم انتي
وأول خطوه كانت
باسم الله علي دربك
بحبك بحبك بحبك يامصر
بعشق ترابك وطمي نيلك
بعشق سمارك وبدر ليلك
وعلي نيلك ياما غنيت
مواويلك
يابلدي يامصر
انتي الاول مالكيش آخر
حبك في قلبي مالوش آخر
انا ابن مصر بيها بتفاخر
شمسك دهب وقمرك ساهر
مهما أغيب مهما اسافر
برجع بشوقي اكتر م الاول
لمية نيلك وعنبر ترابك
يابلدي بحبك بحبك بحبك
يابلدي يامصر
بعشق شوارع متزينه
بخطاوي الشقيانين
بعشك سواقي ميتها
من جبين الفلاحين
بعشق مصانع انتاجها
بيغني المحرومين
بعشق جنودك اللي ضحو
علي حدودك سهرانيين
واعشق سنابل قمحك
وخير طواحينك
ياللي ف سماري ملامحك
بلون طمي نيلك
اتغرب وأرجعلك
ابوس تراب أرضك
مانا بلبل علي غصنك
بيغني مواويلك
يابلدي بحبك بحبك
بحبك يامصر
اعشق بهيه وهيه
علي راسها زلعتها
مالياها من نيلك
وساقيه زارعتها
وحاصده من خيرك
قمحتها ولقمتها
وياسين علي نايه
بيعزف مواويلك
بيغني لشمس نهارك
وعاشق قمر ليلك
راضع حليب نيلك
متربي من خيرك
ماهو ياسين يابهيه
ابنك وشهيدك
حالف لايصون عرضك
ويحافظ علي ارضك
ويموت مليون ياسين
ولا نفرط في نيلك
يابلدي بحبك بحبك
بحبك يامصر
ـــــــــــــــــــــــــــ
شعر/السيد حماد