بقلم / نادية سعد الدين محمد
مش معنى إن اولادك مؤدبين وأخلاق ومتفوقين..
إنك تفتكري السبب إنك أم مثالية وعرفتي تربي..
وإن اللي أولادها أخلاقهم ضايعة ومش متفوقين إنها أم فاشلة..ممكن تكون بتبذل جهد أكتر منك..
كل مافي الأمر إن ابتلاءك مش في عيالك
مش معنى إن جوزك حنين وطيب ورومانسي…
إنك تفتكري السبب إنك عرفتي تملكي قلبه بطريقتك..
وإن اللي جوزها سئ فهي فاشلة ومعرفتش تكسبه..
ممكن تكون زوجة مثالية أكتر منك..
كل مافي الأمر إن ابتلاءك مش في جوازك
مش معنى إن صحتك حلوة ماشاء الله وجسمك رياضي..
إنك تفتكري السبب إنك بتاكلي هيلثي فود وإن اللي جسمها تعبان على طول إنها غير مهتمة بصحتها،،ممكن تكون بتهتم أكتر منك.
كل مافي الأمر إن ابتلاءك مش في صحتك
مش معنى إنك دخلتي كلية عالية ودايما متفوقة في حياتك العملية..
إنك تفتكري السبب في إنك الأذكى والأمهر،،
وإن اللي معاها دبلوم أو مش متفوقة علميا إنها فاشلة..
كل مافي الأمر إن ابتلاءك مش في علمك وعقلك
مش معنى إنك بتعرفي تتاجري وتجيبي فلوس بأي طريقة حلال..وإنك أكثر غنى ومال..
وإن اللي حاولت كذا مرة والدنيا مخبطة معاها إنها فاشلة..
كل مافي الأمر إن ابتلاءك مش في مالك
إحنا مش قضاة على بعض،،
ولا نجاحنا سببه محاولاتنا..
إحنا بنأحذ بالأسباب مع اليقين أن التوفيق بالله..
وإن الفكرة كلها في المنح والمنع من الله..
*فاللي معاه حاجة حلوة يتأكد إنه محض رزق من الله..وبلاش ينظر للمحروم منها إنه معملش اللي عليه..
*واللي ناقصه حاجة يتأكد برده إنه ابتلاء لإختبار الصبر..وإن عين الرزق هو منعه من الحاجة اللي نقصاه..
المصيبة العظيمة في هذه الحياة،،هي مصيبة الدين عفانا الله منها..
فالحمد لله حين منح
والحمد لله حين منع