( حلاوة زمان )*
بقلمي : إبراهيم محمد قويدر
************************
قرب وجرب
وتذوق حلاوة زمان.
قرب وجرب
خذ لك عروسة وحصان.
تعال وتذوق
حلاوة بغاشة
بدون كفة أوميزان .
حلاوة بكل طعم
حلاوة بالسمسم
حلاوة بالمشمش
حلاوة بطعم الرمان .
إللى صوابع الست
واللى مشبك
واللى ديل حصان .
تعال وأوعى
تنسى حلاوة زمان .
الست فى الملاية
اللف والمنديل
عليه ورد وفل كمان .
ما تخرج من بيتها
الا للضرورة القصوى
ومحجوبة ورا البيبان .
الجمال الطبيعى بلا
تكلف ولا تصنع
ولا مسكرة للغربان .
الرجولة شهامة ونخوة
ووقوف مع الحق
والفضيلة بالصولجان .
حتى الجريمة كانت
بسيطة : الست إللى
أكلت ذراع زوجها .
وإلا الراجل اللي أكل
مراته صينية بطاطس
بالشطة كلها حرقان .
وإلا برام الأرز المعمر
والفراخ المحمرة
ومعاها جوزين حمام .
وإلا قعدتك جنب التوتة
وبراد الشاى على الراكية
سواء حران أو بردان .
تعال وقرب وجرب
وخذ لك قطمة
من حلاوة زمان .
بقلمي : إبراهيم محمد قويدر
شاعر القرية
مصر – البحيرة