Share Button

 

مع عبير مدين

هتجيبي موزة ضاني امامية.
وملح وفلفل اسود وبابريكا وكوباية كبيرة سمنة
خضار مشكل (طماطم، جزر، كرفس، كزبرة، بقدونس، بصل، مشروم، فاصوليا وبطاطس او اي حاجة عندك) وهنقطع كل ده و هنحطها بمياة الغسيل بتاعتها في الصينية اللي هتدخل الفرن.
الاول هنتبل بملح وفلفل وبابريكا وحطي الملح في الاول متخافيش.
الملح مش بيخلي اللحمة تطول علي النار … دي اشاعة مغرضة ده العكس هو الصحيح.
بعد الملح والفلفل والبابريكا هندهن كل الموزة الضاني بالسمنة ونغطيها بيها وبعد كدة هنغطيها بكذا ورقة فويل وتبقي محكومة الاغلاق.
الفرن لازم يبقي سخن من الاول وندخل الصينية علي درجة حرارة متوسطة 160 مئوية.
في نقطة مهمة هنا بقي … احنا محتاجين نفتح الفرن كل ٢٠ دقيقة ونشيل الفويل و بنجيب من كل السوائل اللي بتنزل من اللحمة والخضار ونحطها تاني علي اللحمة ونغطيها تاني وندخلها الفرن المهم مش عايزينها محطوطة علي ارضية الصينية عشان مش عايزينها تتسلق احنا عايزنها تتحمر فخليكوا متأكدين ان الموزة فوق كل الخضار اللي عندكم … طيب هنعمل كدة كام مرة … حسب وزن الموزة يعني لو كانت كبيرة هنعمل كدة اربع او خمس مرات حسب درجة التسوية المطلوبة … لو وسط هتبقي ٣ او اربع مرات لغاية ما تحسي انها بقت طرية تمام وبتفك من نفسها.
في اللحظة دي شيلي ورق الفويل و شغلي الشواية لمدة ربع ساعة بس لغاية ما تاخد اللون المحمر الجميل ..

و بالهنا

Share Button

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *