.
بقلم الشاعر / عبد التواب الرفاعي
.
و هات ورقة و قلم
و اكتب
مريض جدا بحب الناس
بيتحمل
و مهما انداس
حنون طيب
و مادد ايده للمحتاج
في نفس الصفحة
اكتب له
قليل البخت من يومه
بيصحى ينام على همومه
قليل الحيلة لكنه
يضحي لصاحبه بهدومه
و اقلب صفحة من تاني
و دون شوقه لبلاده
و عشقه بجد لولاده
و شايل هم كل الناس
و عشق الخير سبيل ذاته
و فوت سطر و التاني
و اكتب عاشها وحداني
بيجنوا عليه كتير جدا
و يتهموه كما الجاني
و ارسم في الآخر برواز
و قول بيته ماكانشي ازاز
و لا حدف ف يوم مظلوم
يبات مهموم علشان الناس
كريم طيب
حنون جدا
يصلي الوقت ف معاده
و حب الناس يا ناس زاده
و يدعي ربنا دوما
يكون الرضا في معاده
و قبل ما تقفل الكراس
رجاء تكتب
شعورك ناحيته انت
عظيم ولا
عبيط جدا