كتب:-علي البديوي
فاكر يا بيت
تحت الحيطان بحترنا أشواق القلوب
والشمس مالت ضللت من حر لمسة ايدها ليّ
كان قلبي يومها لسه حي
علقت قلبي حولَ جيدها سلسلة
وعيونها بلِّت ريق عيوني من النظر
فشربت مي
فاكر يا بيت
لما فردت دراع بيبانك
يحضن النسمة اللي جاية من ريحتها
كان حبي بيعبي ساحتها بالحنين
كانت ساعتها الوردة لسه يدوبها طالعة وشوك مفيش
طب فاكر النجمة اللي وقعت جوه حِجري
وانت سيبتني واتداريت
فاكر يا بيت
طارِت عصافير القلوب ساعة ما فكوا حبسها بين الضلوع
كانت زمان الشمس طالعة ليل نهار
دلوقتي مش حابَّة الطلوع
فردوا شراع المركبة وسواق مفيش
مشيت مع الموج اللي ماشي بلا نهاية أو رجوع
فتَّشنا في البحر اللي مات من قلبها الموجوع شرود
رد السمك وصرخ( حراااااااام )تتكتف الجنة ببشر
وميدخلوش المؤمنين
فاكر يابيت
لما انت كلبشت في ضلوعي
بطنك يوميها كرَّشت من كتر ما اتصبت دموعي
دابت حيطانك من فراقها وشققت
أحلام كتير اتحققت
بس الحياة من غير حبيب مفيهاش حياة
فاكر يا بيت قلبي وشقاه
بلسم ترابك ذكريات بتتداوي أوجاعي بوجع
جدر الزمان لو يتقلع
هتلاقي قبل صورتها آااااااه
وانا عمري من كتر الآهات ولا اتوجعت ولا اشتكيت
لكن آهات بُعد الحبيب غير أي آه ساعة المبيت
فااااكر يا بيت