ـــــــــــــــــــــــــــ
تيجوا نتفق مع بعضينا
طاعة لله في نصب عنينا
والبر والتقوي طبع فينا
نتعاون عليهم مع بعضينا
وننصح بيهم كل أهالينا
تيجوا نبعد عن معاصينا
وننصح فينا عاصينا
ناخد بإديهم وإدينا
نرضي الله وحبيبنا نبينا
ويوم العرض يباهي بينا
تيجوا نختار معانينا
والكلمة تبني ولاد لينا
ولشجرة حروفها نرويها
بذكر الله وحب نبينا
تيجوا نربي أولادنا
على منهج يصلح أيامنا
ويكون نور لظلام ليالينا
تيجوا نحكي لهم أمجادنا
ونقول ازاي كان أجدادنا
أسياد العالم وحاميها
ننصحهم بلاش التوهة
الموضة فالصوا وممقوتة
قنبلة وفي يوم موقوتة
ماينجينا غير أخلاقنا
وحفاظنا على عادتنا
دا جذورنا أصل أجدادنا
من غيرهم مايطرح ثمر فينا
تعالوا إحنا وأهالينا
نحسب كل خطاوينا
لكل ما يرضي الله فينا
نعمله والنية خالصة منا
اتفقنا على خير ينفعنا
والله يبارك ما ناوينا
ويتقبل منا ومنكم اعمالنا
بجزاء يليق بالله خالقنا
سلام عليكم وعلينا
ـــــــــــــــــــــــــــــ
Ghazala Attia
غزالة عطيه