مسحراتي 4
ـــــــــــــــــــــــــ
الطبل طبلي والنقر نقري
وشغلتي مسحراتي
انقر علي الشبابيك
أصحي النايم
وانبه الغفلان
اصحي يانايم
احنا في رمضان
صلي التهجد
واقرا القرآن
علشان تنول
من ربك الغفران
صحي ولادك
صلي جماعه
واقدم لربك
فروض الطاعة
صلي تهجد وصلي تراويح
وسماع القرآن ليك مريح
لحد السحور
ونام مسرور
بعد صلاة الفجر
تلاقي وشك زي البدر
وانكتبلك في الكتاب سطر
من الرحمه والغفران
اصحي يانايم
وحد الدايم
وحد الرحمن
دا شهر العبادة والغفراني
وانا مسحراتي
بصحي القلب
والعقل الغفلان
عن ذكر ربه
الغفور الرحمن
أصحي وأدي
فروض الطاعه
وتوب عن العصيان
إملي فؤادك بالإيمان
قومي يام عبدالرحمن
صحي ولادك
وحضري زادك
ليوم عظيم الشان
صحي قلوبهم
بصلا وذكر
ودعوة والقرآن
قرآن قرايه
او سماع تلاوه
كله زياده في الميزان
إصحي يانايم
وحد الدايم
وصلي علي العدنان
محمد نبينا
شفيع لينا
عند الديان
سحر فؤادك
وزكي قلبك بالقرآن
إصحي يانايم
بكره صيام
ورمضان كريم
ــــــــــــــــــــــــــــ
شعر/السيدحماد