ـــــــــــــــــــــــــــــــ
ياغربة كفاية حنين
حنيني سكاكين
بتقطع فيا
ودمع العين علي الخدين
حافر نهرين
وهم كبير علي اكتافي
بتشكي منه رجليا
كفايه كفايه كفايه
كفايه ياغربه حنين
كفايه ياشوق كاوي ضلوعي
نارك ماتطفيها دموعي
ألم الغربه وجراحها
دواها يزيد مواجيعي
عشان دواها إني أعود
واكون بين ناسي موجود
لكن لسه عليا عهود
لازم الاول أوفيها
عاهدت امي وابويا الكبار
أوفر دواهم وعيش الصغار
وأبني البيت اللي ناقص جدار
اللي وقع من الامطار
كفاية ياغربة تكويني
همي أكبر من حنيني
ومن شوقي ودمع عيني
ارحميني ياغربة
إرحميني
لازم اتحمل عطشي وجوعي
وانسي حنيني واداري دموعي
واتحمل ألم مواجيعي
علشان يوم رجوعي
بشنطة في إيدي
وف جيبي قرشين
ابني الجدار واسد الدين
واربي الصغار واداوي الوالدين
عرفتي ليه أناياغربة مستحملك
عشان همومي أقوي م الحنين
كفاية ياغربة تكويني
همي أكبر من حنيني
ومن شوقي ودمع عيني
ارحميني ياغربة
إرحميني
ــــــــــــــــــــــــــــــ
شعر /السيد حماد