هو كله طوب وزلط ؟! .. كباري وطرق وأسفلت ومدن .. طب وبالنسبة للإنسان ؟

لما كتبت البوست اللى فات عن التغيير اللى شفناه فى البنية التحتية لمصر خلال 7 سنين، واحد صاحبي مشاكس قالي: هو كله طوب وزلط ؟! .. كباري وطرق وأسفلت ومدن .. طب وبالنسبة للإنسان ؟ .. قلتله بسيطة .

. البوست اللى جاي كله عن الإنسان وبس .. فى البداية بس قبل ما صاحبي يتوهنا فى الكلام .. كل المشاريع والطرق والمدن والبنية التحتية دي علشان الإنسان ومستقبله.. لأن أنا وانت وكل مصري هو اللى بيستفيد بيها وبتخلي حياته أفضل وأحسن.

. يعني مثلاً لما بنبني مدينة جديدة زي “الأسمرات”، مش دي بننقذ 850 ألف إنسان كانوا عايشين فى عشوائيات شديدة الخطورة بتهدد حياتهم؟! .. وبعدين هي المشروعات دي مين بيشتغل فيها؟ مش الإنسان المصري ؟! ..

من 7 سنين كانت نسبة البطالة في مصر 13.5%، النهاردة النسبة دي بقت 7.2%، يعني انخفضت للنص بأقل مستوى ليها فى تاريخ مصر .. ومع ذلك .. خلوني أكلمكم بشكل مباشر عن الإنسان .. عن بناء الإنسان! أول حكاية في ذهني … هي حكايتنا مع “فيروس سي”.. كان يا ما كان .. كان فيه بلد اسمها مصر.. ومن ٧ سنين مصر كانت أكبر بلد فى العالم عندها مصابين بفيروس “سي”

، لدرجة إن الناس كانت مصابة بالمرض ومش عارفة.. سألوا نفسهم إزاي نقضي على مرض إحنا مش عارفين مين مصاب بيه؟.. قالوا بسيطة نكشف على كل المصريين!.. إيه ده بجد؟ ينفع؟! آه إحنا عملناها وكشفنا على كل المصريين ضمن حملة 100 مليون صحة، حددنا خريطة المرض، وصرفنا العلاج بالمجان لملايين المرضى علشان نقضي عليه تماما.

. وبقينا بنستعد للإعلان عن صفر إصابات بفيروس سي فى تجربة كانت ملهمة للعالم كله.. بس كده؟ لا مش بس

.. قلنا طالما الناس كده كده بتكشف، ما يكشفوا بالمرة عن الأمراض المزمنة زي الضغط والسكر.. ده غير كشف وفحص الثدي للسيدات علشان سرطان الثدي، ولأطفال المدارس علشان “التقزم والأنيميا”، وللمواليد علشان “ضعف السمع”.. وكل ده بنعالجه بالمجان.

. طب سمعت عن “مبادرة نور الحياة” ؟!.. إحنا بنكشف على الأطفال فى المدارس وأي طالب عنده مشكلة فى بصره الدولة بتصرف له نضارة بالمجان.. مخصصين مليون نضارة مجانية وعملنا لغاية دلوقتي 250 ألف جراحة فى المبادرة دي.. بس كده؟.

. لا مش بس خالص.. نظام التأمين الصحي الشامل الضخم اللى بتعمله مصر هيغير شكل الخدمات الصحية فى مصر كلها.. كل شخص فى مصر خلال 15 سنة هيبقى متأمن عليه وبيتعالج فى مستشفيات سواء خاصة أو حكومة بالمجان هو وأسرته.

. وبما إننا بنتكلم عن الإنسان .. فلازم نتكلم عن التعليم .. والحقيقة احنا بصينا للتعليم بصة احترام وإجلال علشان هو المستقبل.

. أنشأنا 9 جامعات جديدة فى 7 سنين.. وزودنا فصول المدارس 87 ألف فصل علشان نوقف التكدس داخل مدارسنا.. ووصلنا 12.5 مليون طالب بالانترنت من جهاز التابلت من خلال منصة إلكترونية متكاملة عليها الطالب والمدرس وولي الأمر.. طب فاكرين لما حلمنا زمان بـ “تمكين الشباب”؟ .

. النهاردة عندنا 6 شباب عمرهم أقل من 32 سنة وظيفتهم “نائب محافظ”، وأكتر من ٥٠ شاب نواب في البرلمان عمرهم أقل من ٤٠ سنة .. طب هقولك حاجة.. قبل 7 سنين كان عندنا برلمان فيه 5 سيدات بس.. تخيل يبقى نصف المجتمع ستات مكافحة وشقيانة.. ويمثلهم تحت القبة 5 سيدات بس ! .

. النهاردة بقى عندنا 162 سيدة تحت قبة البرلمان.. وكده نبقى أكتر دولة عربية فيها تمثيل للسيدات فى البرلمانات.. ورقم 16 على مستوى العالم ولسه ده مش بس طموحنا..

طموحنا يبقى النص بالنص.. دا غير عدد الوزيرات في الحكومة اللى بتشوفوا جهدهم يومياً.. وحطينا قانون علشان يلزم كل قايمة متقدمة في انتخابات البرلمان إن يكون فيها 3 مرشحين علي الأقل من ذوي الإعاقة علشان يكون ليهم صوت قوي يعبر عنهم .. وما نسيناش الفقير اللى مش قادر..

فيه 14.3 مليون مصري بيستفيدوا من مشروع عظيم اسمه “تكافل وكرامة”.. لما رشدنا الدعم ووجهناه للفئات المستحقة.. علشان ما يبقاش فيه مصري “بيكمل عشاه نوم” زي ما المثل بيقول.. والمرأة المعيلة الشهمة الشجاعة بنساعدها.. 220 ألف سيدة وفرت ليهم الدولة مشروعات بقروض ميسرة وصلت قيمتها لـ 1.4 مليار جنيه..

عارف إن البوست بقى طويل قوي.. بس لسه عندي كلام كتير عايز أقوله عن اللى اتغير فى 7 سنين فيما يخص بناء الإنسان .. علشان كده لسه هيكون للحديث بقية .. #٧_سنين_انجازات #على_العهد_دائماً #محمد_مصطفى_السلاب