بنات العم
**********************
و إن خيروني في بنات العم
أخد الكبيرة اللي تشيل من همي
وإن خيروني في بنات الخال
أخد اللي فيهم عارفة طبعي و حالي
لــــــــكن أنا عايز صبية
يكون قليبها علي
ترسمي لي علي الطاقية
قلب و يمامة و دار
تمسح دمعة بكايا
و رموشها تكون غطايا
و إن طال الليل معايا
كلمتها تكون نهار
يبقي لنا بيت صغير
و قمر أخضر ينور
ولد دايما يدور
عن حاجة يهشها
و هي تتدخل و تتطلع
تتكلم قلبي يسمع
أتكلم هي تسمع
و تحب عشها
لو حتي مفيش فطار
أجي في المغربية
تجري من الدارعلي
تاخدني من أيديا
ونتعشي سوا
نتكلم في اللي فات
و في اليوم اللي أت
ينيمنا السكات
و يصحينا الهوي
و لينا ألف جار
