بهيه
ــــــــــــ
بهيه ياأجمل صبايا الكون
يافاتنه الكل بأجمل عيون
ياللي عجايب الدنيا
في عينك ساكنه
دبلت عيونك وصارت للعشاق قبور
واحنا اللي فضلنا نتغني بيها عصور
كام ياسين استشهدو يوم العبور
فدا لعيونك أم السهام الطاعنه
آه يابهيه ياصبيه
متحنيه مستنيه
الف عريس وعريس
ياخت فؤاده اللي حاربت بعيونها عتريس
يوم ماجريت وفتحت للغلابه الهاويس
وانتي ياست الصبايا
قتلتي برموشك ياسين
هما اتهموكي بقتله
وانه شهيد عيونك الحلوين
وانتي بتحلفي مليون يمين
انك بريئه من دم ياسين
وانك زيه مدبوحة
الف مره بألف سكين
وانهم جعلو عيونك
غصب عنك
قبور للعاشقين
نصدق مين
نصدق اللي بيقولو
انهم بيحموكي من الخاينين
ولا نصدق قولك
انك ضحية انتي وياسين
وان بطنك مش هتولد تاني
ولا ارضك هتطرح قمح للجعانين
وان شريانك نشف
ماعدش يروي البساتين
وانك خلاص بتحفري قبرك
في ارضك
جنب قبور العاشقين
اللي كانو ضحايا حبك
قصدي عيونك الحلوين
اللي علشانها استشهد
مليون ياسين
ــــــــــــــــــــــــــــ
شعر/السيد حماد
أعجبني
تعليق