خواطر أدبية .. ل محمد الشرقاوي

صباح الفل يا مصري
يا عاشق أرضها ونيلها
قوم اصنع بالعمل نصري
ومن كل المحن شيلها
———————————–
يا زهرة الياسمين
مسي لي على الغاليين
مع إن بينا بلاد
ساكنين في نن العين
————————————
يا نظرة المحتار
يا بحر ما له قرار
مش لاقي صاحب وفي
تحكي له على الأسرار
————————————
الجهل لو يختفي
نسبق بلاد وبلاد
نار الفساد تنطفي
وتبقى الحياة أعياد
———————————–
الصبر مني مل
رديت كمان اصبر
لو كنت تعرف حل
شاور عليه واهجر
———————————–
والله حرام عليك
أعلى الشهادات في إيديك
والإملا بتحلف عيب
ارحمني الله يهديك
———————————–
ليه الناس بتحب الغش
وكل يومين بتغير وش
تبني من الأوهام أبراج
تسقط قبل ما يسقط عش
———————————–
يا دنيا ليه الأسى
والظلم بقى طوفان
ضاع الفقير واتنسى
وكأنه مش إنسان
———————————-
إيه خدنا م الإحساس
إلا المرار في الكاس
أما اللي مات قلبهم
حصدوا الدهب والماس
———————————–
اليأس خصم عنيد
أعنف من الإعصار
يصنع خدم وعبيد
ويدمر الأحرار
———————————–
اللي بيشهد زور
أخطر من الشيطان
والظالم المغرور
عمره ما كان إنسان
———————————–
اطلب حقك واوعى تخاف
روحك مش في إيدين سياف
بس الواجب لازم لازم
تعمله كامل بالأوصاف
———————————-
كاتب أستاذ دكتور
عندك مليون جمهور
وكلامك تافه جدا
ألفين غلطة في منشور
———————————-