قطر الصعيد
ــــــــــــــــــــــــــ
ياقطر معدي علي عضمي
فارم لحمي
مين وصاك تقتلني
ماتنقلني للقمة عيشي
مش قبري
ورايا صغار
وعواجيز الدار
ابويا وامي
ويمكن جدي
أرجع ليهم بتمن عرقي
مش في كفني
وتكون نهاية صبري
دخول قبري
قوللي ياقطري
مين وصاك تقتلني
وتفرمني
لحد ماضاعت ملامحي
وكيف أهلي تعرفني
من ملابسي؟
صبغها الدم
من خاتم كان بصابعي
من ساعه لابسها بيدي
من علامه بجسمي
عارفيناها ناسي وأهلي
هوه المفروم
بين عجلك وقضبانك
بتفضل من ملامحه
دليل يدل عليه
أهلي وأهل باقي ركابك
كل واحد لم اللي يقدر عليه
في كيس أسود خده في إيديه
علي أنه لحم اللي كان ليه
وكفنه كيسه الاسود
وعلي قبره سلمه ليه
وجوه القبر صحوني
يحاسبوني
لقيت دراعي لونه أسود
وكتفي بلون أبيض
وفخدي لونه قمحي
ووجهي مش ملامحي
داحتي صدري مش صدري
فيه راجل بيرضع
ورحم من الطلق يتوجع
نهار أسود
انا كام واحد جوايا
ودخلو القبر ويايا
مفروم في الدنيا
وفي الآخرة
ياقبري اصرخ ويايا
ـــــــــــــــــــــــــــــــــ
شعرالسيد حماد