شعر د. ضحى بركات
طالب أنا في الثانوى العام ..عشت الحياة فى مرار وآلام..وسط الكتب كنت اصحى وانام
طالب انا فى الثانوى العام …..
كم ليلى ونهارى بذاكر ..والكل بيقول لى ياشاطر أنت على الصعب القادر ..ارسم بقى حلم الأحلام…..طالب انا فى الثانوى العام
عشت السنين مكبوس محبوس ….وف قلبى تحت الضلع كابوس ..بلف انا وبدور فى دروس…وملو مخى كلام منصوص ..طعم الحياة ماسخ منقوص ..طالب أنا فى الثانوى العام
وبعد غلب امتحنو نى ..والحل خيب لى ظنونى…وعليها مجموعى اتخربط …وحلم عمرى بقى ملخبط ..ودخلت باب الكلية . لقيت بها العلم وسية …
كورسات كتير لجل تعدى .. أو ينتهى الحلم الوردى ….. لكن صبرنا وكملنا ..واهى شهادة تجملنا ..ونلاقى شغلة توكلنا …..ونعيش بها أحسن من غيرنا ..ويبارك الرب ف خيرنا …طالب أنا فى الثانوى العام
لكن واقعنا اتشنكلنا ….ولاشغلة رضيت تقبلنا …وقعدنا على القهوة بنارنا ..ونكمل الشكوى ف ليلنا …ولا زارنا حد ولاجبرنا ولاشوفنا حل لمشاكلنا ….والقهوة اخدت من خيرنا ..ركنت ديوننا على همومنا ….طالب أنا فى الثانوى العام
كان ماله دبلوم فى الطايع … ما أنا كده أو كده ضايع …
كان مالها شغلة مع حبيشة .واشرب لى صنعة . وترويشة . …واعمل لى كام ميت تحويشة …ده الحال شكا من التفليسة ..
طالب أنا فى الثانوى العام.
كام واد زميلى ساب السلم ..دلوقت ماشى مبيسلم …طبعا بقا إسمه معلم ..يؤمر وينهى وانا مبلم …طالب أنا فى الثانوى العام …
وده كمان كان م الحارة …سابنا وقال الدنيا شطارة ..عمل له بزنس وتجارة …زهر الحياة ادى له بشاشة …وبياكل الصبح بوغاشا ..والكل بيقول له ياباشا ..
وانا اللى بختى هنا متلم ..والفول يوماتى على السلم ..وان يوم يجافى ولايسلم..البطن م الجوع تتألم …. طالب أنا ف الثانوى العام
مين السبب في اللى جرى لنا …يتهد حيله ده ضيعنا ..مهما اشتكى مين يسمعنا ..الفقر نار بتلسوعنا ..ولاعم ولاخال ينفعنا ….واللى شبكنا يطلعنا
طالب أنا فى الثانوى العام
ادينى راجع لحبيشة أرص له حجر الشيشة يرمى لى بقشيش فى بريزة …واقول له نورت ياباشا …
..واعيش حياة الفرفشة ..وكفاية عقدة وكربسة ..وخنقة فى الصبح ومسا …..وياريت زمان قبل الهوان سيبنا هموم الثانوى العام …
.طالب أنا فى الثانوى العام