الوسواس القهري

بقلم الدكتورة : هدير سعيد

أخصائي نفسي وتعديل سلوك وعلاج إدمان

الوسواس القهري : هو عبارة عن فكرة أو صورة أو رغبة إندفاعية بتسيطر على تفكير المصاب ضد إرادته.

يعني المصاب بيكون عارف تماما إن الفكرة دي غلط و بيحاول يسيطر عليها و يتخلص منها لكن مبيقدرش و عشان كدا بيحس بالقلق و الإكتئاب أو إنه قرب يتجنن و بيوصل بعد كدا للإحباط و اليأس.

الوسواس القهري بيعذب المصاب بيه و هو واحد من أقسى الإضطرابات النفسية، المصاب بالوسواس القهري دائما حاسس إنه ضعيف ومهزوم و إن معندوش إرادة وعاجز عن السيطرة على أفكاره و خصوصاً الفكرة الوسواسية حتى وهو عارف إنها غلط و مش حقيقية بس هي مسيطرة عليه كإنها حقيقية.

و هنا لازم تكون عارف إن المصابين بالوسواس القهري محتاجين إن اللي حواليهم يكونوا فاهمين طبيعة الإضطراب و إنهم محتاجين المساعدة و إن اللي بيحسوا بيه دا حالة نفسية مش مرض عقلي ( هلاوس أو ضلالات أو هذيان ) لإن المصاب عارف إنه مريض وعلى إتصال كامل بالواقع و هو دائما بيحاول يسيطر على أفكاره لكن مبيقدرش.

عشان كدا المصاب محتاج دائما التعاطف و التفهم و المساندة وكفاية عليه عذاب محاولات المقاومة، أكيد مش هنزود عذابه بالتجاهل أو السخرية أو القسوة.

– الأفكار الوسواسية زي :

1- الخوف من عدم النظافة أو التلوث أو عدم الطهارة.

2- الحاجة الدائمة للترتيب بشكل مبالغ فيه.

3- أفكار عدوانية شديدة بدون أسباب واضحة.

4- أفكار و خيالات ليها علاقة بالجنس أو صور إباحية.

5- خوف من العدوى لو سلمت على حد أو لمست حاجة.

6- شكوك دائمة حول قفل الباب أو الغاز.

– التصرفات القهرية زي:

1- الإستحمام و النظافة المبالغ فيها للدرجة اللي ممكن توصل لإلتهابات جلدية.

2- العد الدائم للأشياء.

3- الفحص الشديد لكل شيء ( الغاز – مفاتيح النور- قفلت العربية ولا لأ – قفلت الباب ولا لأ )

4- النظام الشديد.

5- الرجوع دائماً للتأكد من نفس الشيء.

إكسب كل دقيقة من عمرك و إبدأ رحلة البحث عن سلامتك النفسية.