شعرالسيدحماد
وتلف الدنيا لفتها
وترجع بنفس اسوتها
لايوم بتخف مرارتها
ولا بتجف دمعتنا
طب إمتي يادنيا شفايفنا
تدوق طعم ضحكتنا
وإمتي نعيش فرحتنا
وإمتي تجف دمعتنا
دي بيوتنا
بلون الحزن كسيناها
وكتبنا علي بابها
قبور أحياء ساكناها
لا علقنا فروع زينه
ولا قدنا نور جواها
داحتي الشمس حلفت
مانورها يخش جواها
وكأن اللي ساكنينها
خفافيش
مع وطاويط
وبوم معشش جواها
يادنيا
يوم ماتولدنا كتبو اسامينا
سيد ومحمد واحمد ومينا
وسلمو أهالينا
شهادات بتثبت إننا بشر
ووعدونا
بحياه كريمه طول العمر
ولما كبرنا لقينا
كل كلامهم صفر
لا حصلنا حيوان
ولا طير في السما حر
لقينا نفسنا سمك
عايش في بحر
فينا الحيتان
وفينا القروش
وفينا اللي جوه الجحر
فينا اللي ساكن قصر
وفينا المحشور حشر
وفينا اللي عايش
ومن سكان القبر
فينا العصفور وفينا الصقر
فينا اللي بيسف سكر
وفينا اللي بيلعق مر
فينا اللي فرحان دايما
وفينا اللي عمره ماشاف
غير قهر ومر وضر
فينا اللي فوق النجوم
وفينا اللي تحت القبر
يادنيا فين العدل
وليه ميزانك باطل
كفه فيها العبيد
وكفه فيها السيييييد
مع إن ربك خلقنا
أحرار ولاد حر
ـــــــــــــــــــــــــــــــ