ياه يالطيف …حلم مخيف
شعر د. ضحى بركات
ياه يالطيف حلم مخيف قال ايه رفعوا دعم رغيف
ياخلق هووووه …كفاية تجريف .
الخلق دابت م التخاطيف.
كلمة عدل بقولها واضيف
لو ده قرار له ميت تصريف . .
.اصل اللعب ف سعر رغيف .
.قطمة وسط لكل شريف
وياريت يبقى كلامنا وليف
وياريت لنا فى الحق نصيف
فكره كبير .. قلبه رحيم
عارف إن الفقر مخيف…
ياه يالطيف
سيبوا للغلبان دعم رغيف.
فيه ناس مالهاش غيره حليف
وأهو بيساعد فى التصاريف
دى العيشة صعبة وليها تكاليف
ياه يالطيف
فكر وبلاش عقل نحيف
يجعل ربى كلامى خفيف
ع اللى هيسمع واللى يضيف
واللى هيفتح للمظاريف
قول ده خيال ..عندى عيال …قولوا يارب تكون تخاريف
واللى ضميره وقلبه نضيف
يفهم إن أنا قصدى شريف
خايف ع اللى ف حاله ضعيف
رزق عياله يدوب تناتيف
سيبوا ياناس للبطن رغيف .
كده هنجوع من غير تكليف
قولوا ده كان كدب وتأليف واحد عامل فيها ظريف
عايز يقلب أمن حياتنا عايز يكسر فى التعاريف
..*********************
وياريت يبقى الدرس خفيف
يفهمه خلق بفكر عفيف
ويكون كلمة عدل تأثر
ع اللى ف ايده الامر …ويسمع لينا ..ويحكم بالتخفيف