كتبها / محمود جنيدي
* ** * ** * ** * ** *
إكتب كمان يا شاعر ، وخلى القلم يقول ..
خلى قلمك لسانك ، وقت ماتحتاج تقول ..
بس اوزن كلامك وسمعنى كلام معقول
ماهو القلم سيف فرسان الكلمة يافارس ..
متخافش على مصر أبدا دا ربك الحارس ..
والدم اللى يروى الأرض بيفتّح زهور مارس ..
أما ولاد الكلب فمش حيهزّوا ولا شعرة ..
دول حفنة رعاع وبكرة تدور الدايرة ..
مصر تدفن ابنها واقفة شديدة وصابرة ..
دمعتها على خدها تحرق ولا ألف جمرة ..
لكن تقول بكل شموخ أنا الأبية الحرة ..
عمرى فى يوم ما أنحنى الاّ لرب القدرة ..
فمحدش يخاف عليا أنا واقفة وعزمى شديد ..
ان وقع النهارده شهيد والاّ ألف شهيد ،
الطفل الرضيع بيكبر ونفسه يبقى شهيد ..
الليل مسيره يزول والفجر مش بعيد ..
جاية شمس الأمل ماسكة الزهور فى ايد ،
وايدها التانية تطبطب على أم كل شهيد ..
ونلبس هدوم جديدة ونصلّى صلاة العيد
وتملا وشوشنا الفرحة ومصرنا ارتاحت .. ..
ونقول لبعضنا معلش ، غمّة وانزاحت .
******************
2 مايو 2020
