طريق
ـــــــــــــــــــــ
وتخدنا خطاوينا
في طريق
علي فين مودينا
للوسع ولا الضيق
لدنيا جديدة تسعدنا
ولا لباقي عذابنا
وادينا ماشيين
كأنه علينا دين
ماكافتش لتسديده
اللي عدي م السنين
واخدانا فين
وطريق شقانا
فاضل فيه كام خطوه
رجلينا اتشققت
والنعل داب
ودلوقتي ماشيين حافيين
واخدانا لفين
تعبنا سنين
ولسه سنين تانيين
يمكن شهرين
يمكن يومين
ونلبس آخر توب لينا
وننشال علي الكتفين
واحنا اللي طول العمر
مدهوسين بالرجلين
متهانين
مزروعين في الطين
ويوم ماتكرمينا
وتوب ابيض تلبسينا
وع الاكتاف تشيلنا
نكون رايحين
ومش راجعين
ويكون اول وآخر
تكريم لينا
وزي ماخرجنا
من ضيق البطن لوسعك
لضيق القبر دخلنا
هربانين من تعبك
اكيد يكون ارحم
ياللي ماخدنا منك
غير كفنك
ــــــــــــــــــــــــــ
شعر/السيدحماد